तराईको हुस्सु–कुहिरोले हवाई सेवा अवरुद्ध, यात्रुहरु अलपत्र

समाचार

गृहपृष्ठ
समाचार

तराईको हुस्सु–कुहिरोले हवाई सेवा अवरुद्ध, यात्रुहरु अलपत्र

choicekhabar शुक्रबार, पुस ४, २०८२

तराई क्षेत्रमा बाक्लो हुस्सु र प्रतिकूल मौसमले शुक्रबार देशका आधा दर्जनभन्दा बढी प्रमुख विमानस्थलको हवाई आवागमन ठप्प बनाएको छ। पुस ४ गते बिहानैदेखि भिजिविलिटी अत्यन्तै घटेपछि जनकपुर, सिमरा, भैरहवा, नेपालगन्ज र धनगढी विमानस्थलमा उडान–अवतरण हुन सकेन।

जाडो बढेसँगै फैलिएको कुहिरोका कारण विमानस्थलहरूमा यात्रुहरू लामो समयदेखि प्रतीक्षारत रहन बाध्य भएका छन्। धेरैको उडान तालिका रद्द हुँदा यात्राको योजना नै अस्तव्यस्त बनेको छ। मौसमले साथ नदिँदा सुरक्षा जोखिमका कारण उडान रोकिनुपरेको वायुसेवा कम्पनीहरूको भनाइ छ।

भैरहवा विमानस्थल बन्द हुँदा राजनीतिक गतिविधिसमेत प्रभावित भएको छ। सुप्रिम सहकारी ठगी मुद्दासम्बन्धी कागजी प्रक्रियाका लागि रवि लामिछानेलाई भैरहवा लैजाने तयारी थियो। उनलाई काठमाडौँ विमानस्थलसम्म पुर्‍याइए पनि मौसममा सुधार नआएपछि वैकल्पिक रूपमा चितवनको भरतपुर विमानस्थलतर्फ उडान गराइएको छ।

बुद्ध एयरलगायत विभिन्न वायुसेवा कम्पनीहरूले मौसम अनुकूल नभएसम्म उडान सञ्चालन सम्भव नभएको जनाएका छन्। भिजिविलिटी कम हुँदा तराईका अन्य साना विमानस्थलहरू पनि प्रभावित भएका छन्।

जल तथा मौसम विज्ञान विभागका अनुसार तराईका भूभागमा अझै केही दिन बिहान र दिउँसो कुहिरो लागिरहने सम्भावना छ। विमानस्थल बन्द हुँदा धेरै यात्रुहरूले सडक मार्ग अपनाउनुपरेको छ भने कतिपय उडान पुनः सुरु हुने आशामा टर्मिनलमै कुर्न बाध्य छन्।

प्रकाशित मिति: शुक्रबार, पुस ४, २०८२ १६:०४

प्रतिक्रिया दिनुहोस्