प्रसौनीमा सवारी दुर्घटनाः एक युवकको मृत्यु, एक घाइते

समाचार

गृहपृष्ठ
समाचार

प्रसौनीमा सवारी दुर्घटनाः एक युवकको मृत्यु, एक घाइते

choicekhabar आइतबार, माघ ११, २०८२

वीरगञ्ज– बारा जिल्लाको प्रसौनी गाउँपालिका–२ अन्तर्गत दुधौरा पुल नजिक आज बिहान भएको सवारी दुर्घटनामा एक युवकको मृत्यु भएको छ भने अर्का एक जना घाइते भएका छन्।

आज बिहान करिब ७ बजे वीरगञ्जबाट कलैयातर्फ जाँदै गरेको ट्रकले विपरीत दिशाबाट आइरहेको मा.प्र.०३–०२७प ७८२९ नम्बरको स्कुटरलाई ठक्कर दिएको थियो। दुर्घटनामा स्कुटर चालक कलैया उपमहानगरपालिका–३ निवासी जय गुप्ताका २० वर्षीय छोरा आयुष गुप्ता गम्भीर घाइते भएका थिए। उनको टाउकोमा गम्भीर चोट लागेको थियो।

त्यस्तै, स्कुटरको पछाडि सवार पर्सा जिल्लाको वीरगञ्ज महानगरपालिका–१० घडीहर्वा निवासी बिनोद साह कानुका ३० वर्षीय छोरा मौसम कुमार साहको दाहिने हात र ढाडमा चोट लागेको छ।

दुबै घाइतेलाई उपचारका लागि एलएस न्युरो अस्पताल, परवानीपुर (बारा) पठाइएको थियो। उपचारकै क्रममा बिहान करिब ८ बजे आयुष गुप्ताको मृत्यु भएको अस्पताल प्रशासनले जानकारी दिएको छ।

घटनाको जानकारी पाउनासाथ इलाका प्रहरी कार्यालय प्रसौनीबाट प्रहरी सहायक निरीक्षक सालिम राउत गद्दीको कमाण्डमा प्रहरी टोली घटनास्थलमा खटिएको थियो। दुर्घटनास्थल इलाका प्रहरी कार्यालय प्रसौनीबाट करिब २ किलोमिटर पूर्वमा पर्छ।

प्रहरीका अनुसार दुर्घटना गराएर फरार भएको म.प्र.०३–००२ ख ४१०२ नम्बरको ट्रकलाई कलैयाको हनुमान चोकबाट नियन्त्रणमा लिइएको छ। ट्रक चालक रौतहट जिल्लाको चन्द्रपुर नगरपालिका–२ चौधरी टोल निवासी २४ वर्षीय दिपेश चौधरीलाई नियन्त्रणमा लिई जिल्ला प्रहरी कार्यालय बारा, कलैयामा राखिएको छ।

घटनाबारे थप अनुसन्धान भइरहेको प्रहरीले जनाएको छ।

प्रकाशित मिति: आइतबार, माघ ११, २०८२ १३:२९

प्रतिक्रिया दिनुहोस्