सुरक्षा व्यवस्था कडा, मधेसमा चुनावलाई लक्षित ५० हजार सुरक्षाकर्मी मैदानमा

समाचार

गृहपृष्ठ
समाचार

सुरक्षा व्यवस्था कडा, मधेसमा चुनावलाई लक्षित ५० हजार सुरक्षाकर्मी मैदानमा

choicekhabar आइतबार, माघ १८, २०८२

१८ माघ, काठमाडौं । आगामी फागुन २१ गते हुने प्रतिनिधिसभा सदस्य निर्वाचनलाई मध्यनजर गर्दै मधेस प्रदेशमा सुरक्षा व्यवस्था निकै चुस्त र प्रभावकारी बनाइएको छ ।

निर्वाचनलाई स्वच्छ, निष्पक्ष र भयरहित वातावरणमा सम्पन्न गराउन मधेसका आठै जिल्लामा तीन तहको सुरक्षा घेरा तयार पारिएको छ । प्रदेशभर रहेका २ हजार १६० मतदानस्थलमध्ये ५७ प्रतिशत अर्थात् १ हजार २३७ स्थललाई अति संवेदनशील सूचीमा राखेर विशेष निगरानी थालिएको छ । मधेस प्रदेश प्रहरी कार्यालयका अनुसार अति संवेदनशील क्षेत्रहरूमा सुरक्षाका लागि ड्रोन र सीसी क्यामेरा जस्ता आधुनिक प्रविधिको समेत प्रयोग गरिनेछ ।

सुरक्षा चुनौतीका आधारमा गरिएको वर्गीकरणमा सप्तरी जिल्ला सबैभन्दा बढी जोखिमपूर्ण अर्थात् रेड जोनमा देखिएको छ, जहाँका २०९ मतदानस्थल अति संवेदनशील मानिएका छन् । निर्वाचन सुरक्षाका लागि मधेस प्रदेशमा नेपाल प्रहरी, सशस्त्र प्रहरी र नेपाली सेनासहित करिब ५० हजारभन्दा बढी सुरक्षाकर्मी परिचालन गर्ने तयारी गरिएको छ ।

जसमा १२ हजार ६०० नेपाल प्रहरी, २८ हजार २९५ म्यादी प्रहरी र सशस्त्र प्रहरीका करिब ७ हजार जनशक्ति चुनावी मैदानमा खटिनेछन् । खुला सीमाना र भौगोलिक अवस्थालाई ध्यानमा राख्दै सुरक्षा निकायले सीमावर्ती क्षेत्रमा विशेष सतर्कता अपनाएको छ ।

निर्वाचनलाई लक्षित गरी सीमापारिबाट हुन सक्ने सम्भावित अवाञ्छित गतिविधि रोक्न भारतीय सुरक्षा निकायसँग समेत समन्वय भइरहेको छ । महोत्तरी र धनुषाका प्रमुख जिल्ला अधिकारीहरूका अनुसार बिहारका सीमावर्ती जिल्लाका सुरक्षा अधिकारीहरूसँग विभिन्न चरणमा सुरक्षा बैठकहरू सम्पन्न भइसकेका छन् ।

मतदाताको सहज पहुँच र शान्ति सुरक्षा सुनिश्चित गर्न मोबाइल टोली, स्ट्राइकिङ फोर्स र रिजर्भ फोर्सलाई तयारी अवस्थामा राखिएको छ । सुरक्षा निकायको यो व्यापक तयारीले मधेसमा निर्वाचनको माहोललाई थप सुरक्षित बनाउने विश्वास लिइएको छ ।

प्रकाशित मिति: आइतबार, माघ १८, २०८२ १२:१७

प्रतिक्रिया दिनुहोस्