कोइलाखानी विस्फोटमा मृत्यु भएका तीन नेपालीको उतै अन्त्येष्टि,एक जनाको अन्त्येष्टि अझै बाँकी

समाचार

गृहपृष्ठ
समाचार

कोइलाखानी विस्फोटमा मृत्यु भएका तीन नेपालीको उतै अन्त्येष्टि,एक जनाको अन्त्येष्टि अझै बाँकी

choicekhabar मंगलबार, माघ २७, २०८२

वीरगञ्ज माघ २७ गते । भारतको मेघालयस्थित कोइलाखानीमा भएको विस्फोटमा मृत्यु भएका तीन नेपालीको भारतमै अन्त्येष्टि गरिएको छ भने एक जनाको अन्त्येष्टि अझै बाँकी रहेको छ।

शव नेपाल ल्याउने सम्भावना नभएपछि खोटाङका एकै घरका दाजुभाइ सहित तीन युवाको शव सिलाङको झालुपारामा लगेर माघ २६ गते दाहसंस्कार गरिएको हो।

माघ २२ गते मेघालयको पूर्वी जयन्तिया हिल्सस्थित अवैध कोइलाखानीमा विस्फोट हुँदा ज्यान गुमाएका खोटाङको बराहपोखरी गाउँपालिका–१ सालघारीका २७ वर्षीय पूर्णबहादुर खपाङ्गी मगर, २४ वर्षीय सुरेन्द्र खपाङ्गी मगर र ३५ वर्षीय नरबहादुर खपाङ्गी मगरको दाहसंस्कार गरिएको घटनास्थल पुगेका प्रकाश खपाङ्गी मगरले जानकारी दिनुभयो। पूर्णबहादुर र सुरेन्द्र एकै घरका दाजुभाइ हुन्।

तीनवटै शव नेपाल ल्याउन ठूलो खर्च लाग्ने भएकाले मेघालयमै दाहसंस्कार गरिएको मृतकका आफन्तले बताएका छन्। शव नेपाल ल्याउन सरकारी तहबाट सहयोग नपाएको उनीहरूको गुनासो छ।

कोइलाखानीभित्र भएको डाइनामाइट विस्फोटमा पूर्णबहादुर र सुरेन्द्रको घटनास्थलमै तथा नरबहादुरको उपचारका क्रममा माघ २३ गते मृत्यु भएको थियो। विस्फोटमा बराहपोखरी सालघारीका ४६ वर्षीय कर्णबहादुर खपाङ्गी, बराहपोखरी भञ्ज्याङका ४० वर्षीय बमबहादुर खपाङ्गी र उदयपुर साउनेका ४० वर्षीय ललित मगर गम्भीर घाइते हुनुभएको छ। बराहपोखरी वालम्पाका ताराबल मगर भने सकुशल रहेका छन्। विस्फोटमा दर्जनौँ कामदार खानीभित्र फसेको अनुमान गरिएको छ।

यसैबीच, हलेसी तुवाचुङ नगरपालिका–५ दुर्छिम जोरकाफलका ५० वर्षीय रत्न राईको शव पनि भेटिएको छ। सुरुमा शव नभेटिए पनि केही दिनपछि शव फेला परेपछि गाउँमा काजकिरिया सुरु गरिएको स्थानीयले बताएका छन्। राईको अन्त्येष्टि भने अझै गरिएको छैन। शव उतै अन्त्येष्टि गर्ने वा गाउँ ल्याउने विषयमा आफन्तबिच छलफल भइरहेको छ।

प्रकाशित मिति: मंगलबार, माघ २७, २०८२ १०:५४

प्रतिक्रिया दिनुहोस्