बारागढीमा प्रथम वडा स्तरीय नकआउट फुटबलको उपाधि सिदार्थ युवा क्लबलाई

समाचार

गृहपृष्ठ
समाचार

बारागढीमा प्रथम वडा स्तरीय नकआउट फुटबलको उपाधि सिदार्थ युवा क्लबलाई

choicekhabar मंगलबार, माघ २७, २०८२

बारा, दिपेन्द्र जयसवाल
बाराको बारागढी गाउँपालिका वडा नम्बर–५ मा अवस्थित चेरवन्त पथरास्थित बारागढी रंगशालाको खेल मैदानमा आयोजित प्रथम वडा स्तरीय नकआउट फुटबल प्रतियोगिता सम्पन्न भएको छ। वडा कार्यालयको मुख्य सहयोग तथा श्री न्यु तिलगंगा युवा क्लब चेरवन्त पथराको आयोजनामा सञ्चालन भएको प्रतियोगिताको अन्तिम दिन फाइनल खेल सिदार्थ युवा क्लब हनुमानगञ्ज र तेतरिया फुटबल क्लब तेतरिया बीच सम्पन्न भएको थियो। प्रतिस्पर्धात्मक फाइनल खेलमा सिदार्थ युवा क्लब हनुमानगञ्जले तेतरिया फुटबल क्लबलाई २–० गोल अन्तरले पराजित गर्दै उपाधि हात पारेको हो।

प्रतियोगिताको प्रथम शिल्ड कृष्णमणि चौधरीले प्रदान गरेका थिए भने कार्यक्रमका प्रमुख अतिथि एवम् बारागढी गाउँपालिका वडा नम्बर–५ का वडा अध्यक्ष मैनेजर चौधरीले विजेता सिदार्थ युवा क्लब हनुमानगञ्ज र उपविजेता तेतरिया फुटबल क्लबका खेलाडीहरूलाई नगद पुरस्कार, मेडल तथा प्रमाणपत्र वितरण गरेका थिए।

श्री न्यु तिलगंगा युवा क्लबका अध्यक्ष रामरत्न चौधरीको अध्यक्षतामा सम्पन्न कार्यक्रममा वडा सदस्य विनोद सहनी, गोपीचन्द प्रसाद यादव, समाजसेवी भोजराज चौधरी, हरेन्द्र यादव, पुरुषोत्तम चौधरी, पशु चिकित्सक लक्ष्मी नारायण चौधरी, बारागढी गाउँपालिका कृषि शाखामा कार्यरत नायब सुब्बा अभिषेक चौधरी, नेपाल राष्ट्रिय माध्यमिक विद्यालय सिंहासनीका विद्यालय व्यवस्थापन समिति अध्यक्ष चन्देश्वरराम, सञ्चारकर्मी राजन चौधरी लगायत स्थानीय क्लबका सदस्य, विभिन्न संघ–संस्थाका प्रतिनिधि, स्थानीय राजनीतिक दलका प्रतिनिधि तथा खेलप्रेमी दर्शकहरूको उल्लेख्य उपस्थिति रहेको थियो। कार्यक्रमको सञ्चालन स्थानीय युवा कुन्दन चौधरीले गरेका थिए।

प्रकाशित मिति: मंगलबार, माघ २७, २०८२ १७:०३

प्रतिक्रिया दिनुहोस्