वीरगञ्जको मुख्य सडक विस्तारका लागि ठेक्का आह्वान, कात्तिक २० सम्म बोलपत्र

समाचार

गृहपृष्ठ
समाचार

वीरगञ्जको मुख्य सडक विस्तारका लागि ठेक्का आह्वान, कात्तिक २० सम्म बोलपत्र

choicekhabar शुक्रबार, असोज ३०, २०८३

३० असोज, वीरगञ्ज । लामो समयदेखि पर्खाइ र चर्चाको विषय बनेको वीरगञ्जको मुख्य सडक (मेनरोड) विस्तार तथा स्तरोन्नति प्रक्रिया अन्ततः औपचारिक रूपमा अघि बढेको छ ।

सडक डिभिजन कार्यालय हेटौँडाले त्रिभुवन राजपथअन्तर्गत पर्ने मितेरी पुलदेखि गण्डक चोकसम्मको मुख्य सडकलाई दुई खण्डमा विभाजन गरी निर्माणको ठेक्का प्रक्रिया अगाडि बढाएको हो ।

सडक डिभिजन कार्यालय हेटौँडाद्वारा २०८३ कात्तिक २० गतेसम्म बोलपत्र पेस गर्ने गरी सूचना जारी गरिएको छ भने कुल ११ करोड ५० लाख रुपैयाँ धरौटी रकम तोकिएको छ ।

वीरगञ्जको प्रमुख व्यापारिक तथा यातायातको मेरुदण्ड मानिने मेनरोडको स्तरोन्नति नहुँदा लामो समयदेखि स्थानीयवासी, व्यापारी तथा यात्रुहरूले सास्ती व्यहोर्दै आएका थिए । ठेक्का आह्वान भएसँगै सडक फराकिलो र व्यवस्थित हुने आशा जागेको छ ।

निर्माण कार्यलाई द्रुत र प्रभावकारी बनाउन सडक डिभिजनले कुल ८.०५४ किलोमिटर सडकलाई दुई खण्डमा विभाजन गरेको छ । पहिलो खण्ड मितेरी पुलदेखि घण्टाघरसम्मको शून्यदेखि चार किलोमिटरसम्मको दूरीका लागि ठेक्का नम्बर TRP/RDHTD/33701130/083/84-26 कायम गरिएको छ । यस खण्डको बोलपत्र जमानत (धरौटी) रकम ६ करोड रुपैयाँ र बोलपत्र दस्तुर २० हजार रुपैयाँ तोकिएको छ ।

त्यसैगरी दोस्रो खण्ड घण्टाघरदेखि गण्डक चोकसम्मको चार किलोमिटरदेखि ८.०५४ किलोमिटरसम्मको दूरीका लागि ठेक्का नम्बर TRP/RDHTD/33701130/083/84-27 निर्धारण गरिएको छ । यस दोस्रो खण्डका लागि बोलपत्र जमानत रकम ५ करोड ५० लाख रुपैयाँ र दस्तुर २० हजार रुपैयाँ तोकिएको छ । दुवै खण्डको गरी कुल ११ करोड ५० लाख रुपैयाँ धरौटी रकम तोकिए तापनि कुल आयोजना लागत भने प्रकाशित सूचनामा खुलाइएको छैन

सडक डिभिजन कार्यालय हेटौँडाका अनुसार इच्छुक र योग्य निर्माण व्यवसायीहरूले २०८३ कात्तिक २० गते दिउँसो १२ बजेसम्म अनलाइन वा तोकिएको प्रक्रियामार्फत बोलपत्र पेस गर्न सक्नेछन् । सोही दिन दिउँसो १ बजे बोलपत्र खोलिने कार्यक्रम रहेको छ भने यसअघि कात्तिक ९ गते बिहान ११ बजे ‘प्रि(बिड’ ९बोलपत्रपूर्व० बैठक आयोजना गरिने सूचनामा उल्लेख छ ।

मुख्य सडकको स्तरोन्नति भएसँगै देशकै प्रमुख व्यापारिक नाका वीरगञ्जको ट्राफिक व्यवस्थापन सहज हुने, धुलो(धुवाँको समस्याबाट मुक्ति मिल्ने र समग्र शहरको सौन्दर्य तथा आर्थिक गतिविधिमा सकारात्मक प्रभाव पर्ने अपेक्षा छ । अब ठेक्का प्रक्रिया निष्कर्षमा पुगेर काम कहिलेबाट फिल्डमा सुरु हुन्छ भन्नेमा अहिले वीरगञ्जवासीको चासो र नजर टिकेको छ ।