सामुदायिक वनमा डढेलो लगाएको आरोपमा दुई जना पक्राउ

समाज

गृहपृष्ठ
समाज

सामुदायिक वनमा डढेलो लगाएको आरोपमा दुई जना पक्राउ

choicekhabar मंगलबार, वैशाख १८, २०८१

डढेलो लगाएको आरोपमा गुल्मीमा दुई जना पक्राउ परेका छन्। जिल्लाको रेसुङ्गा नगरपालिका–७ सिस्न्यारा पातल सामुदायिक वनमा डढेलो लगाउने सोही स्थानका ३८ वर्षीय राजकुमार पन्थी क्षेत्री र ४१ वर्षीय राजु जिसी पक्राउ परेको डिभिजन वन कार्यालय गुल्मीका निमित्त वन अधिकृत पङ्कजकुमार ठाकुरले जानकारी दिए।

उनीहरूलाई वन ऐन २०७६ मार्फत् आगो लगाएको कसूरमा मुद्दा चलाउने तयारी गरिएको छ। उनीहरूलाई तीन वर्ष कैद र ६० हजार रुपैयाँ जरिवाना वा दुवै सजाय हुने निमित्त वन अधिकृत ठाकुरले बताए। दुवैले सामुदायिक वनमा आफूहरूले आगो लगाएको स्वीकार गरिसकेका छन्।
गत वैशाख ७ गते आगो लगाएर फरार भएका उनीहरूलाई नेटा बजारबाट आइतबार पक्राउ गरिएको थियो।

कुनै व्यक्तिको लापरबाहीबाट डढेलो लागेको र त्यसले ठूलो क्षति गरेको भन्दै जनचेतना जगाउनु नै मुख्य काम भएको ठाकुरले बताएका छन्। यस्तै आगो लगाएको सुराकी दिने व्यक्तिलाई गोप्य रूपमा पुरस्कार प्रदान गरिने पनि उनले जानकारी दिए।

हाल गुल्मीका १२ स्थानीय तहका ८० सामुदायिक वनमा डढेलो लागेको छ। डढेलोबाट दुई हजार बढी हेक्टर क्षेत्रफल वन नष्ट भएको डिभिजन वन कार्यालय गुल्मीले जनाएको छ। जिल्लाको इस्मा, मदाने र गुल्मी दरबारमा घरगोठमा थुप्रै क्षति भएको छ। घटनास्थलमा राहत र उद्धारको काम भइरहेको जनाइएको छ।

प्रकाशित मिति: मंगलबार, वैशाख १८, २०८१ १६:५७

प्रतिक्रिया दिनुहोस्