हावाहुरीले बाँकेमा ३० घर जलेर नष्ट

समाज

गृहपृष्ठ
समाज

हावाहुरीले बाँकेमा ३० घर जलेर नष्ट

choicekhabar बिहीबार, असार ६, २०८१

नेपालगन्ज, असार ६ गते । बुधबार राती एक्कासी आएको हावाहुरीले बाँकेको डुडुवा गाउँपालिका १ छिटईपुरवा पाझामा आगलागी हुँदा सो गाउँका ३० भन्दा बढी घर जलेर खरानी भएको छ ।

स्थानीय पप्पु यादवले दिनुभएको जानकारी अनुसार बुधबार राती करिब साढे आठ बजे एक्कासी आएको भिषण हावाहुरीले गर्दा आगो उडाएर घरको छानामा खस्दा सो गाउँका ३० घर जलेर खरानी भएको हो । उहाँले आगलागी भएलगत्तै नेपालगन्जमा वारुणयन्त्रलाई जानकारी गराउँदा केही समयमा दमकल गाउँ नजिक पुगेपनि गाउँकै छेउमा रहेको कुलो भत्किएकाले दमकल गाउँमा छिर्न नसक्दा ठुलो क्षति भएको बताउनुभयो ।

दमकल गाउँमा छिर्न नसकेपछि प्रहरी र स्थानीयले आगो निभाउने निकै प्रयास गरेपनि अधिकांश घरहरु जलेर नष्ट भएको नेपाल रेडक्रस सोसाईटी बाँकेका स्वंयसेवक राम मनोहर यादवले बताउनुभयो । उहाँले आगलागीबाट ३० भन्दा बढी परिवार घरबारविहिन भएको जनाउँदै उनिहरुलाई नजिकैको विद्यालयमा राखिएको बताउनुभयो ।

राप्ती नदीको छेउमा रहेको सो गाउँमा हरेक वर्ष बाढीले ठुलो क्षति पुरयाउँदै आएकोमा यस पटक बाढी आउनु भन्दा पहिलेनै आगलागीबाट सबै जलेर नष्ट भएको अर्का स्थानीय तिलक यादवले बताउनुभयो । आगलागीको खबर सुनेर लुम्बिनी प्रदेशका कृषि मन्त्री तथा डुडुवा निवासी भण्डारी लाल यादव तथा पुर्व कृषि मन्त्री बिजय यादव लगायत बिहिबार सो गाउँमा पुग्नुभएको छ ।

उहाँहरुले स्थानीय पीडितहरुसँग भेटेर आगलागीको क्षतिबारे जानकारी लिनुका साथै राहातको व्यवस्था गरिने बताउनुभएको स्थानीय बिशेश्वर यादवले बताउनुभयो । उहाँका अनुसार अहिले क्षतिको यकिन बिवरण सङ्कलन गर्ने कार्य भइरहेको छ भने आगलागीबाट धेरै ठुलो परिमाणमा खाद्यान्न, लुगा लत्ता, भाडा बर्तन, नगद र गरहना समेत जलेको छ ।

प्रकाशित मिति: बिहीबार, असार ६, २०८१ १३:३२

प्रतिक्रिया दिनुहोस्