बाह्य गुप्तचर नियुक्त गर्ने नेपालको तयारी, राष्ट्रिय अनुसन्धान विभागलाई विशेष अधिकार प्रस्ताव

समाचार

गृहपृष्ठ
समाचार

बाह्य गुप्तचर नियुक्त गर्ने नेपालको तयारी, राष्ट्रिय अनुसन्धान विभागलाई विशेष अधिकार प्रस्ताव

choicekhabar शुक्रबार, साउन २३, २०८२

नेपाल सरकारले देशबाहिर पनि गुप्तचर गतिविधि सञ्चालन गर्न सक्ने गरी नयाँ कानुनको मस्यौदा तयार पारेको छ ।

’राष्ट्रिय गुप्तचर तथा अनुसन्धानका सम्बन्धमा व्यवस्था गर्न बनेको विधेयक’ नामक उक्त मस्यौदामा राष्ट्रिय अनुसन्धान विभागलाई यस्तो अधिकार दिने प्रस्ताव गरिएको छ ।

नयाँ विधेयकमा के छ ?

मस्यौदाअनुसार, मुलुकको स्वतन्त्रता, सार्वभौमिकता, भौगोलिक अखण्डता र राष्ट्रिय सुरक्षाको हितका लागि आन्तरिक र बाह्य गुप्तचरी तथा अनुसन्धान गर्ने अधिकार राष्ट्रिय अनुसन्धान विभागलाई दिइनेछ । यो व्यवस्थाले विभागले नेपाल राज्यविरुद्ध हुन सक्ने कुनै पनि जासुसी गतिविधि रोक्नका लागि सूचना सङ्कलन गर्न सक्नेछ । विधेयकमा ’प्रतिगुप्तचरी’ (Counter Intelligence) को व्यवस्था पनि गरिएको छ। यसअन्तर्गत बाह्य राष्ट्र वा निकायबाट हुने जासुसी गतिविधिलाई गोप्य रूपमा रक्षात्मक, प्रतिरक्षात्मक वा प्रतिकारात्मक कार्यमार्फत निस्तेज पारिनेछ । यो कार्यका लागि राष्ट्रिय अनुसन्धान विभाग मातहत एक विशिष्टीकृत कार्यालय स्थापना गरिनेछ ।
साथै, विभागले मुलुकभित्र र बाहिर गोप्य अभियान सञ्चालन गर्न, स्थायी वा अस्थायी सूत्र (Sourse) परिचालन गर्न र प्रमाण सङ्कलन गर्न सक्नेछ।

कानुन निर्माणको प्रक्रिया

प्रधानमन्त्री तथा मन्त्रिपरिषद्को कार्यालयले तयार पारेको यो मस्यौदा हाल सर्वसाधारणको रायका लागि सार्वजनिक गरिएको छ । प्राप्त राय समेटेर परिमार्जन गरिएपछि यसलाई कानुन, न्याय तथा संसदीय मामिला मन्त्रालय र अर्थ मन्त्रालयको रायमा मन्त्रिपरिषद्मा पेस गरिनेछ । मन्त्रिपरिषद्ले स्वीकृति दिएपछि यो विधेयक संसद्मा पुग्नेछ र दुवै सदनबाट पास भएपछि मात्र ऐनका रूपमा लागू हुनेछ ।

प्रकाशित मिति: शुक्रबार, साउन २३, २०८२ १४:२१

प्रतिक्रिया दिनुहोस्