नाडा अटोमोबाइल एशोसियसन अफ नेपाल, मधेश प्रदेशको तेस्रो साधारण सभा तथा नव–निर्वाचित पदाधिकारीको शपथग्रहण कार्यक्रम शुक्रबार सम्पन्न भएको छ। कार्यक्रममा नाडाका केन्द्रीय अध्यक्ष करण चौधरी प्रमुख अतिथि रहेका थिए। उनले नाडाले अन्तर्राष्ट्रिय ख्याति कमाएको दाबी गर्दै छिट्टै महासंघको रूप लिने जानकारी दिए। साथै, खुला सिमानाका कारण अवैध पार्टपुर्जाको व्यापार रोक्न सुरक्षा निकायलाई आग्रह गर्दै नाडालाई अझ सशक्त बनाउन सबैको साझा जिम्मेवारी रहेको उल्लेख गरे।
कार्यक्रममा निर्वाचन प्रमुखले राहुल अग्रवालको अध्यक्षतामा गठित २२ सदस्यीय नाडा मधेश प्रदेश कार्यसमितिलाई शपथ ग्रहण गराएका थिए। समितिमा उपाध्यक्षहरू केदार अग्रवाल, विवेक अग्रवाल, सन्तोष जयसवाल, बिकाश ठाकुर र किसोर भट्टराई रहेका छन्। त्यस्तै, सचिव अभिषेक चौधरी, सहसचिव मुरारी रौनियार, कोषाध्यक्ष दिपेन्द्र खेतान, सहकोषाध्यक्ष बिरेन्द्र रौनियार, पीआर अफिसर राजु गुप्ता, मिडिया कोअर्डिनेटर सन्दीप अग्रवालसहित अन्य सदस्यहरूलाई फुलमाला सहित स्वागत गरिएको थियो।
शपथपछि अध्यक्ष राहुल अग्रवालले दुई वर्षे कार्यकालमा मधेश प्रदेश कमिटीलाई नेपालकै नमुना समिति बनाउने दाबी गर्दै पारदर्शी सहकार्य, कर प्रणाली सुधार, विद्युतीय सवारीसाधन प्रोत्साहन, बैंकिङ तथा बीमा क्षेत्रमा काम गर्ने योजना सार्वजनिक गरे।
कर्लाक होटलमा सम्पन्न कार्यक्रममा पर्साका प्रमुख जिल्ला अधिकारी तोयनारायण सुवेदी, नेपाल उद्योग वाणिज्य संघ मधेश प्रदेश अध्यक्ष अशोक टेमानी, वीरगञ्ज उद्योग वाणिज्य संघ अध्यक्ष हरी गौतम, नाडा चितवन अध्यक्ष कुलबहादुर रानाभाट, नाडा उपाध्यक्ष राजनबाबु श्रेष्ठलगायतले शुभकामना मन्तव्य दिएका थिए।
कार्यक्रममा जिल्ला ट्राफिक प्रहरी कार्यालय बर्दिवासका प्रहरी सहायक निरीक्षक अजित भण्डारी, ट्राफिक कार्यालय धुषाका हवलदार रामबाबु साह र राजमार्ग सुरक्षा कार्यालय पथलैयाकी प्रहरी जवान हस्तकुमारी बि।क लाई नगदसहित सम्मान गरिएको थियो।
कार्यक्रममा नेपाल पत्रकार महासंघ मधेश प्रदेशका अध्यक्ष श्याम बन्जारा ,उद्योगी गणेश लाठ,प्रहरी उपरिक्ष गौतम मिश्र लगायतको उपस्थ्तिी थियो ।
कार्यक्रम पूर्व अध्यक्ष केदार अग्रवाल र नवनिर्वाचित अध्यक्ष राहुल अग्रवालको अध्यक्षतामा सम्पन्न भएको हो।कार्यक्रममा स्वागत मन्तव्य नाडाका पुर्व अध्यक्ष केदार अग्रवालले गरेका थिए ।
-1756462703.jpg)
