काठमाडौं — नेकपा एमालेको ११ औं राष्ट्रिय महाधिवेशनका लागि प्रतिनिधि चयन आज देशभर एकैदिन हुँदैछ। मंसिर २७ देखि २९ गतेसम्म काठमाडौंमा हुने महाधिवेशनका लागि जिल्लादेखि जनसंगठन, निर्वाचन क्षेत्र र प्रदेशस्तरीय कमिटीहरूमा प्रतिनिधि छान्ने काम तीव्र गतिमा अघि बढाइएको हो।
कतिपय स्थानमा शुक्रबार नै सर्वसम्मत रूपमा प्रतिनिधि चयन भइसकेका छन् भने अधिकांश ठाउँमा आज बिहानसम्म पनि सहमतिमै चयन गर्ने प्रयास जारी रहेको एमाले नेताहरूले बताएका छन्। सहमति नजुटेको स्थानमा भने निर्वाचनमार्फत प्रतिनिधि टुंग्याइनेछ।
एमाले संगठन विभागका सचिव माधव ढुंगेलले निर्वाचन प्रक्रियामा जानुभन्दा पहिला सम्बन्धित क्षेत्रको अन्तिम मतदाता सूची अनिवार्य रूपमा सार्वजनिक गर्न निर्देशन दिइएको बताए। उनका अनुसार केन्द्रिय कमिटी र सचिवालयको परिपत्रअनुसार प्रतिनिधि चयनको मापदण्ड स्पष्ट पारिएको छ र सोही अनुसारै संगठन विभागले देशभर समान निर्देशिका लागू गरेको छ।
ढुंगेलले सकेसम्म सर्वसम्मत चयन गर्ने प्रयास भए पनि सहमति नजुटे आज नै देशभर तथा प्रवासमा पनि निर्वाचन गर्ने गरी तयारी गरिएको जानकारी दिए। उनले कुनै पनि कारण देखाएर प्रतिनिधि छनोट प्रक्रिया आजभन्दा पछाडि नधकेल्न निर्देशन दिइएको र मंसिर १५ भित्र सबै विवरण केन्द्रमा पठाइसक्नुपर्ने बताए।
प्रतिनिधि उम्मेदवारी शुल्क अधिकतम १ हजार रुपैयाँ तोकिएको छ। एमालेको महाधिवेशनमा करिब २२ सय प्रतिनिधि सहभागी हुनेछन्।
रामेछापका एमाले सचिव प्रकाश कुमार कार्कीका अनुसार तोकिएका मापदण्डअनुसार पहिलो प्राथमिकता सर्वसम्मत चयनलाई दिइनेछ र आवश्यक परे लोकतान्त्रिक पद्धतिमा निर्वाचन गरिने व्यवस्था छ। पार्टीका ६ लाख ६७ हजार ६३० संगठित सदस्यले सम्बन्धित क्षेत्रका उम्मेदवारलाई मतदान गर्न पाउनेछन्।
एमालेले सदस्य संख्या र भौगोलिक प्रतिनिधित्वका आधारमा ‘क्लस्टर’ प्रणाली लागू गरेको छ। सबैभन्दा ठूलो क्लस्टर भूगोल हो, जसलाई संघीय निर्वाचन क्षेत्रका आधारमा विभाजन गरिएको छ। केन्द्रिय कमिटी, तीन आयोग, केन्द्रीय सल्लाहकार परिषद्का प्रतिनिधिसहित विशेष जिल्ला, प्रदेश र जनसंगठनबाट आउने प्रतिनिधिहरू समावेश हुनेछन्। साथै, प्रत्येक निर्वाचन क्षेत्रबाट कम्तीमा एक जना युवा प्रतिनिधि अनिवार्य गर्ने व्यवस्था गरिएको छ।
-1764062258.jpg)
