नेपाल–भारत खुला सीमामा बढ्दो दुरुपयोग रोक्न युवा सक्रिय, कडा निगरानीको माग

समाचार

गृहपृष्ठ
समाचार

नेपाल–भारत खुला सीमामा बढ्दो दुरुपयोग रोक्न युवा सक्रिय, कडा निगरानीको माग

choicekhabar आइतबार, मंसिर १४, २०८२

वीरगञ्ज । नेपाल–भारत खुला सीमामा पछिल्लो समय दुरुपयोग, अवैध आवत–जावत, मानव तस्करी तथा सङ्गठित अपराध तीव्र रूपमा बढ्दै गएको भन्दै पर्साका जेन–जी युवाहरूले कडा सुरक्षा व्यवस्थाको माग गरेका छन्।

आइतबार वीरगञ्जमा दर्जनौँ युवाहरूले जिल्ला प्रशासन कार्यालय पुगेर प्रमुख जिल्ला अधिकारी (सीडिओ) भोला दाहाललाई ज्ञापनपत्र बुझाए। उनीहरूले खुला सीमा अपराधी र तस्करका लागि ‘सेफ पासेज’ बन्दै गइरहेको भन्दै तत्काल प्रभावकारी कदम चाल्न आग्रह गरे।

ज्ञापनमा सीमावर्ती नाकामा परिचयपत्र अनिवार्य जाँच गर्ने प्रमाणीकरण कक्ष, सिसिटिभी तथा ड्रोनमार्फत डिजिटल निगरानी, नेपाल–भारत संयुक्त गस्ती, ‘शून्य सहनशीलता’ नीति र विशेष तस्करीविरोधी अभियान सञ्चालन जस्ता उपाय अविलम्ब लागू गर्न जोड दिइएको छ।
“आगामी निर्वाचन नजिकिँदै जाँदा जोखिम झन् थपिन सक्छ,” ज्ञापनमा भनिएको छ, “राष्ट्रिय सुरक्षा र सामाजिक सद्भाव कमजोर बन्ने खतरा देखिएको छ।”

सीडिओ दाहालले युवाहरूको चासो उचित रहेको स्वीकार गर्दै सुझाबहरू सम्बन्धित केन्द्रीय निकायमा पठाइने तथा सीमामा निगरानी सुदृढीकरणका काम भइरहेको जानकारी दिए। ज्ञापनको प्रतिलिपि प्रधानमन्त्री कार्यालय र गृह मन्त्रालयलाई पनि पठाइएको छ।

यसैबीच भारतको पश्चिम बंगालमा मतदाता सूची पुनरीक्षण सुरू भएपछि वर्षौँदेखि त्यहाँ लुकेर बसेका बङ्गलादेशी तथा रोहिंग्या नागरिक नेपालतर्फ सर्न सक्ने सम्भावना रहेकाले सतर्कता आवश्यक रहेको युवाहरूले बताएका छन्।

झापाको काँकडभिट्टा–पानीटंकी नाकामा मात्र सन् २०२५ को जनवरीदेखि अक्टोबरसम्म भारतीय सशस्त्र सीमा बल (एसएसबी) ले ३७ जना बङ्गलादेशी नागरिक पक्राउ गरेको भारतीय मिडियाले उल्लेख गरेको छ। उनीहरूलाई कानुनी प्रक्रियाका लागि बङ्गाल प्रहरीलाई बुझाइएको छ। नेपालतर्फ भने परिचयपत्र जाँच प्रणाली कमजोर भएकाले अवैध प्रवेश सहज भएको सुरक्षा विशेषज्ञहरूको आकलन छ।