नेपाल जनता पार्टीद्वारा हिन्दू पत्रकार संघलाई बिशेष सम्मान: भवन र पुरस्कारको घोषणा

समाज

गृहपृष्ठ
समाज

नेपाल जनता पार्टीद्वारा हिन्दू पत्रकार संघलाई बिशेष सम्मान: भवन र पुरस्कारको घोषणा

choicekhabar आइतबार, माघ ४, २०८२

नेपाल जनता पार्टीले हिन्दू पत्रकार संघका नवगठित पदाधिकारी, सदस्य तथा सल्लाहकारहरूलाई सम्मानपत्रसहित सम्मान गरेको छ। आइतबार आयोजित विशेष कार्यक्रममा उक्त सम्मान प्रदान गरिएको हो।
कार्यक्रममा पार्टीका वरिष्ठ नेता सन्तोष पटेलले पत्रकारितामार्फत हिन्दूत्व, धर्म–संस्कृति तथा समाजसेवामा योगदान पुर्‍याउँदै आएका सञ्चारकर्मीहरूको सम्मान र वृत्तिविकासका लागि महत्वपूर्ण घोषणा गर्नुभयो। उहाँले फागुन २१ गते हुने निर्वाचनमा आफ्नो पार्टीबाट सांसद निर्वाचित भएमा हिन्दू पत्रकार संघको भवन निर्माणका लागि आवश्यक जग्गा उपलब्ध गराउने र वार्षिक रूपमा नगद पुरस्कार प्रदान गर्ने प्रतिबद्धता व्यक्त गर्नुभयो।
साथै, आगामी वर्षदेखि लागू हुने गरी संघको निर्णयअनुसार वितरण गरिने कुल ६५ हजार रुपैयाँ बराबरका तीनवटा वार्षिक पुरस्कार घोषणा गरिएको छ। घोषित पुरस्कारमा काशीनाथ तिवारी पुरस्कार र अनिल पटेल पुरस्कारअन्तर्गत जनही २५–२५ हजार रुपैयाँ तथा युवा क्रियाशील पत्रकारिता पुरस्कारअन्तर्गत १५ हजार रुपैयाँ प्रदान गरिने जनाइएको छ। पुरस्कार छनोटको सम्पूर्ण अधिकार हिन्दू पत्रकार संघलाई दिइएको छ। यसका अतिरिक्त संघमा आबद्ध पत्रकारहरूको बीमा व्यवस्थापन समेत पार्टीले गर्ने प्रतिबद्धता जनाएको छ।
कार्यक्रमका विशिष्ट अतिथि तथा हिन्दू पत्रकार संघका केन्द्रीय अध्यक्ष राजन रौनियारले नेपाल जनता पार्टीको पहलप्रति आभार व्यक्त गर्दै यस दिनलाई संघको इतिहासमा महत्वपूर्ण र ऐतिहासिक उपलब्धिको रूपमा उल्लेख गर्नुभयो। उहाँले आगामी निर्वाचनमा हिन्दूवादी शक्तिहरू एकजुट हुन आवश्यक रहेको बताउँदै संघले विभिन्न दलहरूबीच समन्वयकारी भूमिका खेल्न तयार रहेको धारणा व्यक्त गर्नुभयो।
नेपाल जनता पार्टी पर्सा जिल्ला अध्यक्ष अनिल कुर्मीको अध्यक्षतामा सम्पन्न समारोहमा हिन्दू पत्रकार संघका केन्द्रीय सल्लाहकार, पदाधिकारी तथा सदस्यहरूलाई विशेष सम्मान गरिएको थियो। कार्यक्रममा पार्टीका केन्द्रीय तथा जिल्ला तहका नेताहरूको उल्लेखनीय उपस्थिति रहेको थियो।
वक्ताहरूले सञ्चार क्षेत्र तथा धर्म–संस्कृतिको संरक्षण र प्रवर्द्धनका लागि पार्टी र पत्रकार संघबीचको सहकार्यले सकारात्मक सन्देश प्रवाह गर्ने विश्वास व्यक्त गरेका छन्।

प्रकाशित मिति: आइतबार, माघ ४, २०८२ २१:१४

प्रतिक्रिया दिनुहोस्