पर्सागढीमा एमाले उम्मेदवार रिमा यादव र अगुवा कार्यकर्ताबीच अन्तरक्रिया

राजनीति

गृहपृष्ठ
राजनीति

पर्सागढीमा एमाले उम्मेदवार रिमा यादव र अगुवा कार्यकर्ताबीच अन्तरक्रिया देश विकासका लागि एमालेको जित अपरिहार्य : रिमा यादव

राकेश साह बिहीबार, माघ ८, २०८२

पर्सा। नेकपा एमाले पर्सा निर्वाचन क्षेत्र नम्बर २ की उम्मेदवार रिमा कुमारी यादव र पर्सागढी नगरपालिकाका अगुवा कार्यकर्ताबीच भेटघाट तथा अन्तरक्रिया कार्यक्रम सम्पन्न भएको छ। बिहीबार दिउँसो पर्सागढीको बढनिहारमा सो कार्यक्रम सम्पन्न भएको थियो ।नेकपा एमाले पर्सागढी नगरपालिका अध्यक्ष दुर्गा प्रसाद लामिछानेको अध्यक्षता एवं पार्टीका केन्द्रीय सदस्य विजय सरावगी प्रमुख आतिथ्यमा भएको कार्यक्रममा समानुपातिक उम्मेदवार तथा मधेश प्रदेश उपाध्यक्ष बिचारी यादव, पर्सागढी नगरपालिकाका मेयर गोकर्ण पाठक, जिल्ला उपसचिव सिता लामा, सचिवालय सदस्य उद्धव बहादुर उप्रेति, जिल्ला कमिटी सदस्य तैयव मिया लगायतका नेताहरूले धारणा राखेका थिए।

कार्यक्रमलाई सम्बोधन गर्दै उम्मेदवार रिमा कुमारी यादवले देशको समग्र विकासका लागि नेकपा एमालेको जित अपरिहार्य रहेको बताइन्। आन्तरिक तथा बाह्य शक्तिहरूबाट भइरहेका षड्यन्त्रविरुद्ध सम्पूर्ण नेपाली एकताबद्ध हुनुपर्ने उल्लेख गर्दै उनले एमाले उम्मेदवारलाई विजयी गराउन आग्रह गरिन्।

उनले मधेशी महिलाको आवाज संसदमा सशक्त रूपमा उठाउने प्रतिबद्धता व्यक्त गर्दै विशेषगरी पार्टीले आफूलाई ‘जेन–जी’ उम्मेदवारका रूपमा अघि सारेकोमा गर्व लागेको बताइन्। आफू विजयी भएर त्यो भरोसा पूरा गर्ने दाबी पनि उनले गरिन्।

प्रमुख अतिथि विजय सरावगीले यस क्षेत्रमा एमालेको जित सुनिश्चित रहेको दाबी गरे। जसपा एमालेमा समाहित भइसकेको र कांग्रेसबाट दुई जना उम्मेदवार मैदानमा रहेकाले यो निर्वाचन एमालेका लागि अनुकूल रहेको उनको भनाइ थियो। उनले अघिल्ला प्रतिनिधिहरूले अपेक्षित काम गर्न नसकेको उल्लेख गर्दै यसपटक एमालेको जित सहज हुने विश्वास व्यक्त गरे .