रिमा यादवको उदयले पर्सा–२ को चुनावी समीकरण बदलिँदै,पुराना अनुहारप्रति असन्तुष्टि, नयाँको विकल्पमा रिमा यादव

राजनीति

गृहपृष्ठ
राजनीति

रिमा यादवको उदयले पर्सा–२ को चुनावी समीकरण बदलिँदै,पुराना अनुहारप्रति असन्तुष्टि, नयाँको विकल्पमा रिमा यादव

राकेश साह आइतबार, माघ १८, २०८२

वीरगञ्ज । मतदाताले विकल्प खोजिरहेको वर्तमान अवस्थामा पर्सा निर्वाचन क्षेत्र नम्बर २ मा नेकपा एमालेकी उम्मेदवार रिमा कुमारी यादव मतदाताको आशाको केन्द्र बन्दै गएकी छिन् । यादव नेकपा एमालेबाट पर्सा क्षेत्र नं. २ मा प्रतिनिधिसभा सदस्यको उम्मेदवार हुन् । राजनीतिमा नयाँ अनुहार देखिए पनि समाजसेवामा भने उनी पुरानै र परिचित पात्रका रूपमा चिनिन्छिन् । विशेषगरी शिक्षा, महिला सशक्तीकरण र सामाजिक रूपान्तरणका क्षेत्रमा उनले लामो समयदेखि निरन्तर काम गर्दै आएकी छिन् ।

नेकपा एमालेले युवालाई अवसर दिन्छ भन्ने आमधारणा कम रहेको समयमा पार्टीले जनताको चाहना र परिवर्तनको मागलाई आत्मसात गर्दै रिमा यादवलाई उम्मेदवार बनाएको छ । ‘जेन–जी’ पुस्ताको सक्रियता र नयाँ नेतृत्वको मागबीच योग्य, ऊर्जावान र युवा उम्मेदवारको रूपमा यादव पहिलो रोजाइमा परेकी हुन् ।

वीरगञ्ज महानगरपालिका वडा नम्बर २९ मुसैली निवासी यादवले विशेष गरी बालबालिकालाई विद्यालय भर्ना गराउने, विद्यालय छोड्ने (ड्रपआउट) दर घटाउने र अभिभावकलाई शिक्षाप्रति सचेत बनाउने अभियानमा उल्लेखनीय योगदान दिँदै आएकी छिन् । यही कारण शिक्षा क्षेत्रसँग आबद्ध अभिभावक, शिक्षक र युवाहरू उनको पक्षमा खुलेर समर्थन जनाइरहेका छन् ।

यसअघि पटक–पटक दोहोरिएका पुराना अनुहारप्रति असन्तुष्टि बढिरहेको अवस्थामा यसपटक मत परिवर्तन गर्ने मनस्थितिमा मतदाता देखिएका छन् । युवा, सक्षम र महिला उम्मेदवारको रूपमा यादव देखिँदा मधेशका धेरै मतदाताले उनलाई परिवर्तनको प्रतीकका रूपमा हेर्न थालेका छन् ।

विशेषगरी मधेश समाजमा अझै पनि महिलालाई घुम्टो र चुलोचौखोमा सीमित राख्ने सोचलाई तोड्दै महिलाहरू नेतृत्व तहमा पुग्नुपर्छ भन्ने सन्देश यादवको उम्मेदवारीले दिएको स्थानीय महिला अगुवाहरू बताउँछन् । महिला अधिकार, समान सहभागिता र अवसरको पक्षमा यसअघि पनि आवाज उठाउँदै आएकी यादवले आफ्ना मुद्दालाई अब संसदमार्फत राष्ट्रिय तहमा सशक्त ढंगले उठाउने अठोट गरेकी छिन् ।

रोजगारी सिर्जना, शिक्षा सुधार, स्वास्थ्य सेवामा पहुँच र स्थानीय विकास उनका प्रमुख प्राथमिकताहरु हुन् । राजनीतिक विश्लेषकहरूका अनुसार पछिल्लो समय रिमा यादवप्रति बढ्दो समर्थनले पर्सा क्षेत्र नं. २ को चुनावी समीकरणलाई नयाँ मोड दिएको छ । मतदाताको चाहना र परिवर्तनको आकांक्षालाई सम्बोधन गर्न सक्ने उम्मेदवारको रूपमा यादव स्थापित हुँदै गएको क्षेत्र न. २ का बासिन्दाको निचोड छ ।

पर्सा–२ मा अहिले चुनावी माहोल थप उत्साहपूर्ण बन्दै गएको छ । मतदाताहरू यसपटक सचेत भएर मत प्रयोग गर्ने मनस्थितिमा देखिएका छन् र त्यो परिवर्तनको केन्द्रमा रिमा यादव उभिँदै गएको स्थानीयहरूको भनाइ छ ।

प्रकाशित मिति: आइतबार, माघ १८, २०८२ २२:०५

प्रतिक्रिया दिनुहोस्