बहुदरमाईमा चुनावी रणनीति तिव्र : रिमा यादवको जितका लागि वडा

राजनीति

गृहपृष्ठ
राजनीति

बहुदरमाईमा चुनावी रणनीति तिव्र : रिमा यादवको जितका लागि वडा–वडामा कमिटी गठन

राकेश साह शनिबार, फागुन २, २०८२

पर्सा निर्वाचन क्षेत्र नम्बर–२ बाट नेकपा एमालेकी उम्मेदवार रिमा कुमारी यादवलाई विजयी गराउन बहुदरमाई नगरपालिकामा एमाले नेता–कार्यकर्ताले चुनावी सक्रियता बढाएका छन्। नगरपालिकाको वडा नम्बर–२ र ४ मा अगुवा कार्यकर्ताको छुट्टाछुट्टै बैठक बसेर फागुन २१ गते हुने प्रतिनिधिसभा निर्वाचन लक्षित विभिन्न रणनीतिक निर्णय गरिएको हो।

वडा नम्बर–२ मा चन्देश्वर रावको अध्यक्षतामा सम्पन्न बैठकले चुनाव परिचालन समिति, प्रचार–प्रसार समिति तथा बुथ कमिटी गठन गर्ने निर्णय गरेको छ। बैठकमा एमाले मधेश प्रदेश उपाध्यक्ष एवं समानुपातिक उम्मेदवार बिचारी यादव, नेता शिव पटेल, पुरन पटेल, कृष्णा यादवलगायतको सहभागितामा चुनावी अभियानलाई प्रभावकारी बनाउने विषयमा विस्तृत छलफल गरिएको थियो। सहभागीहरूले टोल–टोलमा पुगेर मतदाता भेटघाट गर्ने, घरदैलो अभियानलाई तीव्र बनाउने र संगठन विस्तार गर्ने योजना अघि सारे।

यस्तै वडा नम्बर–४ मा पालिका अध्यक्ष सिंघाहासन साहको उपस्थितिमा बसेको बैठकले पनि उम्मेदवार यादवलाई विजयी गराउन माहोल सिर्जना गर्ने, स्थानीय मुद्दालाई प्राथमिकतामा राख्ने र प्रत्येक बुथमा सक्रिय टोली खटाउने निर्णय गरेको छ। उक्त बैठकमा पनि बिचारी यादव,प्रमोद कुशवाहा, शिव पटेल, पुरन पटेल, कृष्णा यादवलगायत स्थानीय नेताहरूको सहभागिता रहेको थियो।

बैठकहरूमा बोल्ने वक्ताहरूले रिमा यादवलाई युवापुस्ताको आशा र विकासमुखी नेतृत्वका रूपमा प्रस्तुत गर्दै सीमावर्ती क्षेत्रको समस्या समाधान, रोजगारी सिर्जना, सडक–खानेपानी सुधार, शिक्षा र स्वास्थ्य सेवाको विस्तारजस्ता मुद्दालाई प्राथमिकतामा राखेर चुनावी अभियान चलाउने बताएका छन्।

एमालेका स्थानीय कार्यकर्ताहरूले बहुदरमाईका विभिन्न टोलमा घरदैलो, जनसम्पर्क र प्रचार–प्रसार कार्यक्रमलाई तीव्र पार्ने निर्णय गरेका छन्। आगामी निर्वाचनमा एकताबद्ध भएर उम्मेदवार यादवलाई जिताउने लक्ष्यसहित कार्यकर्ताहरू मैदानमा उत्रिएको एमाले स्रोतले जनाएको छ।

प्रकाशित मिति: शनिबार, फागुन २, २०८२ १९:१०

प्रतिक्रिया दिनुहोस्