वीरगञ्ज–३१ बेलवामा प्रदिप यादवको घरदैलो, शिक्षा–स्वास्थ्यदेखि रोजगारीसम्म प्राथमिकता

राजनीति

गृहपृष्ठ
राजनीति

वीरगञ्ज–३१ बेलवामा प्रदिप यादवको घरदैलो, शिक्षा–स्वास्थ्यदेखि रोजगारीसम्म प्राथमिकता

राकेश साह बिहीबार, फागुन १४, २०८२

नेकपा एमाले पर्सा १ का उम्मेदवार प्रदिप यादवले बिहिबार वीरगंज वडा नम्बर–३१ अन्तर्गत बेलवा टोलमा घरदैलो तथा जनता दर्शन कार्यक्रम सम्पन्न गरेका छन । कार्यक्रममा ठूलो संख्यामा स्थानीय नेता कार्यकर्ताहरुको सहभागिता रहेको थियो। कार्यक्रममार्फत स्थानीय बासिन्दासँग प्रत्यक्ष भेटघाट गर्दै नेताहरूले जनताको सुझाव, गुनासा र अपेक्षा सुनेका थिए।

घरदैलो अभियानका क्रममा शिक्षा, स्वास्थ्य, खानेपानी, सडक स्तरोन्नति, सरसफाइ, कृषि प्रोत्साहन, युवालाई रोजगारी तथा महिला सशक्तीकरणजस्ता विषयमा प्राथमिकता दिने प्रतिबद्धता व्यक्त गरिएको थियो। स्थानीय स्तरमा सुशासन, पारदर्शिता र जनमुखी सेवा प्रवाहलाई केन्द्रमा राखेर विकास योजना अघि बढाइने नेताहरूले बताएका छन्।

कार्यक्रममा स्थानीय बासिन्दाले पनि आफ्ना समस्या खुलेर राखेका थिए। सडक मर्मत, ढल निकास, खानेपानीको सहज उपलब्धता, युवालाई रोजगारी तथा सार्वजनिक सेवामा सुधारका मागहरू उठाइएका थिए। नेताहरूले ती समस्यालाई योजनाबद्ध रूपमा समाधान गर्ने प्रतिबद्धता जनाए।

बेलवा टोलका स्थानीयहरूले विगतमा भएका केही विकास कामको स्मरण गर्दै आगामी दिनमा अझ प्रभावकारी काम हुने अपेक्षा व्यक्त गरेका थिए। “हामीलाई नजिकबाट काम गर्ने, जनताको कुरा सुन्ने नेतृत्व चाहिएको छ,” एक स्थानीयले बताए।

आगामी निर्वाचनमा सूर्य चिन्हमा मतदान गरी विजयी गराइदिन आग्रह गर्दै नेताहरूले “समृद्ध वडा, सुखी नागरिक” निर्माणको साझा लक्ष्य पूरा गर्न सबैको साथ आवश्यक रहेको बताएका छन्।

कार्यक्रममा स्थानीय समाजसेवी, बुद्धिजीवी, महिला तथा युवा समूहका प्रतिनिधि, पार्टीका वडा तथा क्षेत्रीय तहका नेताहरूको उल्लेख्य उपस्थिति रहेको आयोजकले जनाएको छ। बेलवा टोलबाट सुरु भएको घरदैलो अभियान आगामी दिनमा वडा नम्बर–३१ का अन्य टोलहरूमा पनि निरन्तर सञ्चालन गरिने जानकारी दिइएको छ।

स्थानीय सहभागिता, विकासमुखी एजेन्डा र चुनावी सक्रियताले वडा नम्बर–३१ मा चुनावी माहोल थप तातेको देखिएको छ। स्थानीयवासीले विकास र सेवा केन्द्रित नेतृत्वलाई साथ दिने संकेत दिएका छन्।