पर्सा प्रशासनद्वारा निर्वाचन सुरक्षा र चाडपर्व सम्बन्धी विशेष सूचना

समाचार

गृहपृष्ठ
समाचार

पर्सा प्रशासनद्वारा निर्वाचन सुरक्षा र चाडपर्व सम्बन्धी विशेष सूचना

choicekhabar शनिबार, फागुन १६, २०८२

वीरगञ्ज– पर्सा जिल्ला प्रशासन कार्यालयले प्रतिनिधिसभा सदस्य निर्वाचनलाई स्वच्छ, निष्पक्ष र शान्तिपूर्ण वातावरणमा सम्पन्न गर्न विशेष सूचना जारी गरेको छ। प्रशासनले सुरक्षा संवेदनशीलतालाई मध्यनजर गर्दै केही महत्वपूर्ण निर्णय सार्वजनिक गरेको हो।

जिल्ला प्रशासनका अनुसार, यही फागुन २१ गते हुने प्रतिनिधिसभा सदस्य निर्वाचनलाई लक्षित गर्दै निर्वाचन आयोग र गृह मन्त्रालयको निर्देशन, जिल्ला सुरक्षा समितिको निर्णय तथा सर्वदलीयरसर्वपक्षीय बैठकको सहमतिका आधारमा आदेश जारी गरिएको छ। आदेश उल्लंघन गर्नेहरूलाई प्रचलित कानून बमोजिम कारबाही गरिने चेतावनी दिइएको छ।

सीमा बन्द र आवतजावतमा कडाइ

प्रशासनले फागुन १८ गते राति १२ बजेदेखि फागुन २१ गते राति १२ बजेसम्म पर्सा जिल्लासँग जोडिएका भारतीय सीमाना पूर्ण रूपमा बन्द रहने जनाएको छ। निर्वाचन अवधिभर आवतजावतमा कडाइ गरिने बताइएको छ।

होली र रमजान शान्तिपूर्ण रूपमा मनाउन आग्रह

सर्वसाधारणलाई होली तथा रमजान पर्व मनाउने क्रममा शान्ति सुरक्षा खल्बलिने गतिविधि नगर्न आग्रह गरिएको छ। प्रशासनले सार्वजनिक स्थानमा हो–हल्ला गर्ने, मदिरा तथा मादक पदार्थ सेवन गरी अशान्ति फैलाउने, जबर्जस्ती रंग छ्याप्ने, भिडभाड गर्ने, मेला–महोत्सव वा सांगीतिक कार्यक्रम आयोजना गर्ने जस्ता कार्य नगर्न निर्देशन दिएको छ।

निर्वाचनको सुरक्षा व्यवस्थालाई प्राथमिकता दिँदै धार्मिक तथा सांस्कृतिक पर्वहरू आफ्नै घर–आँगनभित्र मर्यादित रूपमा मनाउन प्रशासनले आग्रह गरेको छ।

जिल्ला प्रशासन कार्यालयले जारी गरेको उक्त सूचनाले निर्वाचन र चाडपर्वलाई शान्तिपूर्ण र व्यवस्थित रूपमा सम्पन्न गर्न सबै राजनीतिक दल, उम्मेदवार, सर्वसाधारण तथा सरोकारवालासँग सहयोगको अपेक्षा गरेको छ।

प्रकाशित मिति: शनिबार, फागुन १६, २०८२ १४:३३

प्रतिक्रिया दिनुहोस्