पर्सा जिल्ला निर्वाचन क्षेत्र नम्बर–२ का लागि अजय चौरसियाले आइतबार नेपाली कांग्रेसको तर्फबाट वीरगंज महानगरपालिका वडा नम्बर–१० मा व्यापक घरदैलो कार्यक्रम सम्पन्न गरेका छन्। आसन्न निर्वाचनलाई लक्षित गर्दै आयोजना गरिएको उक्त कार्यक्रममा स्थानीय बासिन्दाको उल्लेख्य सहभागिता देखिएको थियो।
घरदैलो अभियानअन्तर्गत चौरसिया वडा नम्बर–१० का विभिन्न टोल, गल्ली तथा चोकमा पुगेर मतदातासँग प्रत्यक्ष भेटघाट गरेका थिए। उनले घर–घरमा पुगेर जनताको गुनासो सुन्नुका साथै आफ्नो प्रतिबद्धता र भावी योजना प्रस्तुत गरेका थिए। कार्यक्रममा कांग्रेसका स्थानीय नेता–कार्यकर्ता, भातृ संगठनका प्रतिनिधि तथा युवाहरूको सक्रिय उपस्थिति रहेको थियो।
घरदैलोका क्रममा उम्मेदवार चौरसियाले वीरगञ्ज–१० का लागि विशेष विकास खाका सार्वजनिक गर्दै पूर्वाधार, शिक्षा, स्वास्थ्य र रोजगारीलाई प्राथमिकतामा राख्ने बताएका छन्। “वडा नम्बर–१० मा ढल–नाला, सडक स्तरोन्नति, खानेपानी व्यवस्थापन र फोहोर व्यवस्थापनजस्ता आधारभूत समस्याहरू दीर्घकालीन रूपमा समाधान गर्नुपर्ने अवस्था छ,” उनले भने, “यी विषयलाई केन्द्र र प्रदेशसँग समन्वय गरेर योजनाबद्ध रूपमा अघि बढाइनेछ।”
उनले विशेष गरी युवालाई लक्षित गरी सीपमूलक तालिम, स्वरोजगार प्रवर्द्धन र साना उद्यममा सहुलियत कर्जाको व्यवस्था गर्न पहल गर्ने प्रतिबद्धता जनाए। महिला सशक्तीकरण, सामाजिक सुरक्षा र ज्येष्ठ नागरिकको सम्मानलाई पनि आफ्नो प्राथमिकतामा राखेको उनले स्पष्ट पारे।
घरदैलोका क्रममा स्थानीयवासीहरूले सडक मर्मत, ढल निकास, विद्युत् लाइन व्यवस्थापन तथा स्वास्थ्य सेवामा सुधारको माग राखेका थिए। कतिपय बासिन्दाले बेरोजगारी र बढ्दो महँगीप्रति चिन्ता व्यक्त गरेका थिए। चौरसियाले सबै गुनासा टिपोट गर्दै “जनताको समस्या नै मेरो एजेन्डा हो” भन्ने प्रतिक्रिया दिएका थिए।
स्थानीय अगुवा तथा बुद्धिजीवीहरूले निर्वाचनपछि पनि जनप्रतिनिधि जनतामाझै रहनुपर्ने धारणा राख्दै निरन्तर संवादको अपेक्षा व्यक्त गरेका थिए। त्यसप्रति सकारात्मक प्रतिक्रिया दिँदै चौरसियाले आफू निर्वाचित भएपश्चात नियमित जनसुनुवाइ कार्यक्रम सञ्चालन गर्ने प्रतिबद्धता जनाए। पर्सा–२ मा विभिन्न दलका उम्मेदवारबीच प्रतिस्पर्धा तीव्र बन्दै गएको छ। वीरगञ्ज महानगरपालिकाका विभिन्न वडामा दलहरू आ–आफ्नो पक्षमा मत माग्न सक्रिय देखिएका छन्। यसै क्रममा वडा नम्बर–१० मा सम्पन्न घरदैलो कार्यक्रमलाई कांग्रेसले आफ्नो पक्षमा माहोल सुदृढ बनाउने प्रयासका रूपमा लिएको छ।
कार्यक्रमको अन्त्यमा सहभागी नेता–कार्यकर्ताले आगामी दिनमा पनि वडा–वडामा सशक्त अभियान सञ्चालन गर्ने बताएका छन्। स्थानीय बासिन्दासँगको प्रत्यक्ष संवाद र समर्थनले आफू उत्साहित भएको बताउँदै उम्मेदवार चौरसियाले लोकतन्त्रको सुदृढीकरणका लागि मतदानमार्फत परिवर्तन सम्भव हुने धारणा व्यक्त गरे।
-1772446321.jpeg)
