सर्वोच्चको फैसला: वीरगञ्जमा त्रिभुवन राजपथ विस्तारको बाटो खुल्यो

समाचार

गृहपृष्ठ
समाचार

सर्वोच्चको फैसला: वीरगञ्जमा त्रिभुवन राजपथ विस्तारको बाटो खुल्यो

choicekhabar सोमबार, फागुन २५, २०८२

वीरगञ्ज । सर्वोच्च अदालतले त्रिभुवन राजपथ अन्तर्गत वीरगञ्ज क्षेत्रको सडक विस्तार रोक्न माग गर्दै दायर गरिएको रिट निवेदन पूर्ण रूपमा खारेज गरेको फैसलाको पूर्ण पाठ सार्वजनिक गरेको छ।

फैसलासँगै सडक विभागलाई काठमाडौँ–पथलैया–वीरगञ्ज भन्सार खण्डको सडक विस्तार कार्य अगाडि बढाउन बाटो खुलेको छ। अदालतले सडक किनारका जग्गाधनीहरूको सम्पत्ति हक र क्षतिपूर्ति माग अस्वीकार गर्दै लामो समयदेखि विवादमा रहेको सडक विस्तार मुद्दालाई टुंगो लगाएको हो।

गत वर्ष फागुन २८ गते न्यायाधीशद्वय विनोद शर्मा र महेश शर्मा पौडेलको संयुक्त इजलासले सुनाएको फैसलाको पूर्ण पाठ आइतबार सार्वजनिक गरिएको हो। अदालतले राजमार्ग (निर्माण तथा व्यवस्था) ऐन, २०२१ र सार्वजनिक सडक ऐन, २०३१ का प्रावधानका आधारमा सडक विस्तारलाई कानुनसम्मत ठहर गरेको छ।

फैसलामा त्रिभुवन राजपथको सडक सीमा केन्द्रबिन्दुबाट दायाँ–बायाँ २५–२५ मिटर क्षेत्र २०२१ मङ्सिर ११ को नेपाल राजपत्र सूचनाबाट नै निर्धारण भएको उल्लेख गर्दै सो क्षेत्रमा बनेका संरचनामा क्षतिपूर्ति लागू नहुने ठहर गरिएको छ।

पूर्ण पाठ सार्वजनिक भएसँगै वीरगञ्ज खण्डमा सडक विस्तारको काम छिट्टै सुरु हुने अनुमान गरिएको छ। नेपाललाई भारतीय सीमासँग जोड्ने मुख्य मार्ग भएकाले त्रिभुवन राजपथलाई देशको महत्वपूर्ण आर्थिक करिडोरका रूपमा लिइन्छ।

प्रकाशित मिति: सोमबार, फागुन २५, २०८२ १०:५३

प्रतिक्रिया दिनुहोस्