एक महिने सिलाई कटाई तालिम सुरु

समाचार

गृहपृष्ठ
समाचार

एक महिने सिलाई कटाई तालिम सुरु

जगत राई शनिबार, जेठ ९, २०८३

पर्सा, ९ जेष्ठ — सुलभ सीपमूलक तालिम केन्द्र सखुवा पर्सौनी–३, पर्साको आयोजना तथा वीरगञ्ज महानगरपालिका वडा नं. ३२ को सहयोगमा एक महिने सिलाई कटाई तालिम सुरु भएको छ।

सुलभ सीपमूलक तालिम केन्द्रका सञ्चालक सुरेश प्रसाद पटेलको अध्यक्षता तथा वीरगञ्ज महानगरपालिका वडा नं. ३२ का वडा अध्यक्ष रियाज मोहम्मदको प्रमुख आतिथ्यमा तालिम उद्घाटन गरिएको हो।

कार्यक्रमलाई सम्बोधन गर्दै प्रमुख अतिथि वडा अध्यक्ष मोहम्मदले तालिमबाट भरपुर फाइदा लिन तथा सीपमार्फत आयआर्जनतर्फ उन्मुख हुन सहभागी महिलाहरूलाई सुझाव दिनुभयो। उहाँले महिलाहरूलाई आत्मनिर्भर बनाउन यस्ता सीपमूलक तालिम प्रभावकारी हुने बताउनुभयो।

त्यसैगरी वडा सदस्य ईसाद अन्सारीले तालिममा सहभागी महिलाहरूलाई तालिमको महत्व बुझेर प्राप्त सीपलाई व्यवहारमा उतार्न आग्रह गर्नुभयो।

कार्यक्रममा जनभण्डाफोर दैनिकका कार्यकारी सम्पादक एवं जगत समाचारका सञ्चालक जगत राईले तालिम केवल सिकाइमा सीमित नभई आत्मनिर्भर बन्ने माध्यम भएको उल्लेख गर्दै सहभागी महिलाहरूलाई सीपलाई आयआर्जनसँग जोड्न आग्रह गर्नुभयो। उहाँले वडाले महिलाहरूलाई सक्षम र आत्मनिर्भर बनाउन विभिन्न तालिम सञ्चालन गरिरहेको उल्लेख गर्दै प्राप्त अवसरको सदुपयोग गर्न सुझाव दिनुभयो।