सनसाइन इङ्लिस बोर्डिङ स्कुलमा अन्तरसदन राखी प्रतियोगिता सम्पन्न

समाचार

गृहपृष्ठ
समाचार

सनसाइन इङ्लिस बोर्डिङ स्कुलमा अन्तरसदन राखी प्रतियोगिता सम्पन्न

जगत राई बिहीबार, भदौ ११, २०८३

वीरगञ्ज । वीरगञ्ज महानगरपालिका–१४ पिपरास्थित सनसाइन इङ्लिस बोर्डिङ स्कुल प्रा.लि.मा अध्ययनरत विद्यार्थीबीच आयोजित अन्तरसदन राखी प्रतियोगिता–२०८३ सम्पन्न भएको छ।

रक्षाबन्धनको अवसर पारेर आयोजना गरिएको प्रतियोगितामा विभिन्न सदनका विद्यार्थीले उत्साहपूर्वक सहभागिता जनाउँदै आकर्षक तथा सिर्जनात्मक राखी निर्माण गरी आफ्नो प्रतिभा प्रस्तुत गरेका थिए।

प्रतियोगितामा विद्यार्थीले तयार पारेका राखीमा प्रेम, सम्मान, आत्मीयता र आपसी एकताको भावना झल्किएको विद्यालयका सञ्चालक अमित आलोकले बताए। उनका अनुसार प्रतियोगिताले विद्यार्थीको सिर्जनशीलता विकास गर्नुका साथै समूहमा काम गर्ने क्षमता, सहकार्यको भावना तथा सांस्कृतिक पर्वप्रतिको ज्ञान र सम्मान अभिवृद्धि गर्न सहयोग पुगेको छ।

प्रतियोगितामा ग्रीन हाउस प्रथम, रेड हाउस द्वितीय र यल्लो हाउस तृतीय भएका छन्।

विजेता सदनका विद्यार्थीलाई प्रशंसापत्र प्रदान गर्दै सञ्चालक आलोकले बधाई तथा शुभकामना व्यक्त गरे। उनले आगामी दिनमा पनि यस्ता सिर्जनात्मक तथा अतिरिक्त क्रियाकलापमा सक्रिय सहभागिता जनाउँदै आफ्नो प्रतिभा प्रस्तुत गर्न विद्यार्थीलाई सुझाव दिए।

शिक्षासँगै अतिरिक्त क्रियाकलापले विद्यार्थीको क्षमता, मेहनत र सिर्जनशीलतामा निखार ल्याउने भएकाले विद्यालयले यस्ता गतिविधिलाई निरन्तर प्राथमिकता दिँदै आएको आलोकले बताए।

प्रकाशित मिति: बिहीबार, भदौ ११, २०८३ १५:४२

प्रतिक्रिया दिनुहोस्