एसईईमा उत्कृष्ट नतिजा ल्याउने २१ विद्यार्थी सम्मानित

समाज

गृहपृष्ठ
समाज

एसईईमा उत्कृष्ट नतिजा ल्याउने २१ विद्यार्थी सम्मानित

जगत राई आइतबार, जेठ २४, २०८३

वीरगन्ज । वीरगन्ज महानगरपालिकाभित्रका सामुदायिक विद्यालयबाट माध्यमिक शिक्षा परीक्षा (एसईई) २०८२ मा उत्कृष्ट नतिजा हासिल गर्ने २१ विद्यार्थीलाई शैक्षिक सहिद मुकुन्द प्रसाद खनाल स्मृति प्रतिष्ठानले सम्मान गरेको छ।

शनिबार वीरगन्ज पब्लिक कलेजको सभाहलमा आयोजित कार्यक्रममा महानगरका प्रत्येक सामुदायिक विद्यालयबाट उत्कृष्ट जीपीए ल्याएर उत्तीर्ण भएका एक–एक जना विद्यार्थीलाई नगद १ हजार ५ सय रुपैयाँसहित सम्मानपत्र प्रदान गरिएको हो।

कार्यक्रमका प्रमुख अतिथि वीरगन्ज महानगरपालिकाको शिक्षा महाशाखाका प्रमुख आनन्द लामिछाने, प्रतिष्ठानकी अध्यक्ष मुना खनाल तथा सल्लाहकार प्रकाश उपाध्यायले विद्यार्थीहरूलाई सम्मान गरेका थिए।

कार्यक्रममा बोल्दै शिक्षा महाशाखा प्रमुख लामिछानेले सामुदायिक विद्यालयका विद्यार्थीहरूले उत्कृष्ट नतिजा हासिल गरेर शिक्षा क्षेत्रमा नयाँ आशा जगाएको बताए। उनले सम्मानलाई प्रेरणाका रूपमा लिएर आगामी अध्ययनमा अझ उत्कृष्ट प्रदर्शन गर्न विद्यार्थीहरूलाई आग्रह गरे।

प्रतिष्ठानले यस्ता सम्मान कार्यक्रमले विद्यार्थीहरूमा प्रतिस्पर्धात्मक भावना विकास गर्नुका साथै सामुदायिक विद्यालयप्रतिको विश्वास बढाउन सहयोग पुग्ने विश्वास व्यक्त गरेको छ। कार्यक्रममा शिक्षा, सामाजिक तथा विभिन्न क्षेत्रका व्यक्तित्व, अभिभावक र शुभेच्छुकहरूको उल्लेख्य उपस्थिति रहेको थियो।

प्रकाशित मिति: आइतबार, जेठ २४, २०८३ १२:५४

प्रतिक्रिया दिनुहोस्