रोजगार सुनिश्चित गर्ने उद्देश्यसहित बीरगंजमा एकदिने रोजगार मेला सुरु

समाज

गृहपृष्ठ
समाज

रोजगार सुनिश्चित गर्ने उद्देश्यसहित बीरगंजमा एकदिने रोजगार मेला सुरु

जगत राई बिहीबार, असार ११, २०८३

बीरगंज — बीरगंज उद्योग वाणिज्य संघको आयोजना तथा युवाहरूका लागि गुणस्तरीय प्राविधिक तथा व्यावसायिक शिक्षा तथा तालिम (क्वालिटी) परियोजना अन्तर्गत मधेश प्रदेश सरकारको आर्थिक सहयोगमा एकदिने रोजगार मेला सुरु भएको छ।

संघका अध्यक्ष हरि गौतमको अध्यक्षतामा आयोजित रोजगार मेलामा ११ वटा स्टल राखिएका छन्। मेलामा आठ वटा प्राविधिक शिक्षालयका करिब १०० जना विद्यार्थीहरूको सहभागिता रहेको छ।

रोजगार मेलाको मुख्य उद्देश्य उद्योगी तथा प्राविधिक शिक्षालयबीच प्रत्यक्ष अन्तरक्रिया गराई उद्योगलाई आवश्यक जनशक्ति छनोट गरी रोजगारीको अवसर उपलब्ध गराउनु रहेको आयोजकले जनाएको छ। उद्योगीहरूले सहभागी १०० जना विद्यार्थीमध्ये करिब १० देखि १५ जनालाई रोजगारीको सुनिश्चितता प्रदान गर्ने प्रतिबद्धता व्यक्त गरेका छन्।

मेलामा विभिन्न उद्योग तथा कम्पनीसँग आबद्ध प्रतिनिधिहरूले विद्यार्थीहरूलाई आफ्ना सीप र दक्षतालाई व्यवहारमा उतार्ने अवसरका रूपमा उद्योग क्षेत्रलाई उपयोग गर्न सकिने जानकारी दिएका थिए।

कार्यक्रममा उद्योग वाणिज्य संघका शिवजी गुप्ता, क्वालिटी परियोजना मधेश प्रदेशका व्यवस्थापक छविनकुमार मगर, एलडीआईका निर्देशक अनिलकुमार जयसवाल तथा विभिन्न कम्पनीका व्यवस्थापकहरूको उपस्थिति रहेको जानकारी मित्रदेव यादवले दिएका छन्।

कार्यक्रमको अन्त्यमा संघका उपाध्यक्ष माधवराज पालले धन्यवाद ज्ञापन गरेका थिए।

प्रकाशित मिति: बिहीबार, असार ११, २०८३ १७:१९

प्रतिक्रिया दिनुहोस्